Ka Seng Samla Mawlai Pyllun (SSMP) ynne i step ka 26 tarik da pynkynmoo ko ya u Montri Rangbah ka jylla, u Conrad Kongal Sangma hajrong i dawa wa ka chnong Mawlai da booh ko hakhmat ka sorkar heiwa kawi na kini toh wow kyrriah noh ya ka ktem ki chipai-pulit CRPF na ka chnong Mawlai.
U President ka SSMP, u Samuel Biam da ong u wa ka seiñ da pynbor ko ya u Montri Rangbah wa ki nong Mawlai toh u yoh ko i esñiawbha Christmas Gift na ka sorkar deiwa kyrriah noh ya ka ktem ka CRPF, neibhah wa i em kini ki chipai-pulit ha ka chnong da wanrah i chiboon i kulmar.
Da ong u leh wa neiliang u Montri Rangbah da pyntip u cha ka seiñ wa ini i kaam da lai i chaphrang wei neiliang ka sorkar da pait ko ya 3-4 tylli ki thaw wei i kyrriah u man i hadien wa da pynbiang chwa ya i thaw chawi tawon heiwa da pyntip u leh wa ki heh ka CRPF da man ki kiwa smat wow mih na ka chnong lada yoh thaw chawi tawon.
Ha iwi i liang u Biam da khana u wa ka SSMP da pynsñiaw ko ya i pyrchah ya i thmu ka sorkar wow kyrriah ya ka Tribal Research Institute, heiwa da ong ko wa emkaam wow pynmiat chooh chooh ya ini i thaw iwa em ha Mawlai Nongkwar, neibhah katkam ka yutip wa ka seiñ da ong wa da em i thmu wow kyrriah noh ya ka Tribal Research Institute cha Ri-loom Garo. Tangwa ha i yachem wa u Montri Rangbah, ynne ka sngi da klam che u wa ym em kam itæ i thmu heiwa iwa cha Ri-loom Garo ka sorkar daw chna ko da kawi tawon.
