Ka seiñ ki khynroo wa tip kam ka Seng Samla Mawlai Pyllun (SSMP) hawa yachem wa u Montri Rangbah ka jylla, u Conrad K Sangma ynne ka sngi da dawa ko na ka sorkar wow pynsmat noh u kyrriah ya ka Marten na Mawlai.
U President ka seiñ, u Samuel Biam da ong u wa i em ka Marten ha ka chnong Mawlai da wanrah i ya iwa boon i eh i khoo ya kiwa chong chnong, wei hadien wa u Montri ka chnat Urban Affairs hadien wa wan sylli ya ini i thaw wei da chong u leh ya ka yalang hajrong kani ka kaam ha Secretariat, da kular u wa ka sorkar daw chimkhia ko yeini.
Da ong u wa hajrong ini i kaam, ka sorkar leh da thung ko ya kawi ka Marten Site Monitoring Committee wa khlieh da u Montri, u Sniawbhalang Dhar wa embynta lang ka chnat pynroi sor, ka SMB, ki dkhot ka SSMP wa ka Mawlai Town Dorbar.
Da ong u leh wa ini i kaam dang lai i chaphrang wei da pyntip u leh wa neiliang ka sorkar da chimkhia ko yeini heiwa da em leh kattu katni ki bru kiwa da wan wow tyrwa ya i thaw wei ka sorkar dadep lai pait ko ya kini ki thaw heiwa ka sorkar da jied wei da thooh laad ko kammon u leh khnang wa ym mih iwon iwon i eh i khoo hadien habood.
Chooh chooh da ong u wa ka seiñ da pynkynmoo ko leh ya u CEO ka Shillong Municipal Board hajrong ini i kaam neibhah wa ka thong yong ka seiñ toh wow kyrriah ya ka Marten na Mawlai.
