Ka seiñ kiwa ri wei Supply syiar napoh Ri-loom Jaiñtia, ka All Jaiñtia Poultry Farmers Traders Association (AJPFTA) ha kini ki sngi wa da dep, da dep pynman ya ka Executive Committee wei da iwi i sur ka seiñ da rai ko wow khut daka dorbar bah ya waroh kiwa ri syiar Broiler, Layer, Kroiler nadooh East wa West Jaiñtia haka 07-12-2021 ha Dorbar Hall Mookynphad, Mihmyntdu, West Jaiñtia Hills heipor 10:30 i step.
I thmu wa kongsan yong ka seiñ wow khut ya kani ka Meeting heh toh wa neipor chei por wa kiwa ri syiar yong ka thaaiñ da wan ood ki cha ka seiñ naki daw wa boon i eh kiwa yachem ha ki kaam ri syiar yong ki.
Ka seiñ da ong chooh chooh ko wa kat dang mih ki sngi ki snem, da chem wa i dooh kaam dooh jaam dang joor i wei da em leh kiwa boon ki khynroo, ki manbei manpa kiwa da chaniah katni ha ini i kaam ri syiar wow pyndap yei emkaam waroh ha yung ha sem wa ha kiwi kiwi ki bynta.
Kamtæ ym yohsa de wow khut jhan ya kani ka yalang bah neibhah katwa dang mih ki sngi kiwa ri syiar da yachem ki chiboon i eh hadooh i dor i mur, i rukom pynlai yaw wa kiwi kiwi de i eh.
Chooh chooh ka seiñ da iwi i sur da rai wow pdiang pynyabi lang ya waroh kiwa ri syiar hapoh ri-loom Jaiñtia nadooh East wa West Jaiñtia hapoh ka lama ka Association khnang wow nang ye wow pynku ya kani ka kaam ri syiar deiwa ya ksohkti lang wa i ya krehlang.
