I jæd i pra yong ka Congress ha ka jylla Meghalaya da nang mih man-ka-sngi hadien wa mih ki 12 ngut ki MLA wow lai pynyabi wa ka All India Trinamool Congress. Ynne ka sngi won, palat 400 ngut kiwa yahkhmat ka Meghalaya Pradesh Youth Congress na Khasi wa Jaiñtia da soi ki wow ekti yei mih noh na ka Party.
U Fernandez Dkhar da pyntip u wa da psiah u cha kani ka seiñ khynroo yong ka Indian National Congress nadooh u snem 2005, tangwa da pynsñiaw u wa hap u wow iehnoh yei man dkhot ynne ka sngi neibhah wym yahaap ya ki rukom krehkaam ka Party. Da ong u wa ka Membership Enrollment Drive namo ka pynpsiah dkhot toh kawi na i daw neibhah kiwa yahkhmat na Delhi ym em kynjoh ktien ki ya ki, tangwa hawa kylli, da ong wa toh u yaklam wa u President ka MPCC.
Da ong wa kiwa yahkhmat ka Congress ki pynemkaam ki ya ki du ha ki por wa emkaam ya ki, tangwa yow rai ya ka lympung ki khynroo, kam ki dkhot ym tip ki iyi iyi. Da pyntip wa hadien kattæ leh da pyrchang wow pynbait ya ki kynrum kynram, tangwa najrong wym ye u pynbait, da sdang wow pynpsiah dkhot khlem da bood ya ki kyndon, wei i pynpsiah dkhot da pynyoo wa uwon uwon leh ye u wow man President yong ka jylla lada em poisa.
Da pyntip wa u President ka MPCC, u Vincent H Pala da kylli u na ki dkhot, lada u Fernadez em poisa næ ym em wow man President Youth Congress. Da ong chooh chooh wa da pyrchang wow pynkohngooh ya ki para khynroo, tangwa katwa dang lai ki sngi da pyrchang wow pynbiej ki.
U Fernandez uwa man u General Secretary warim ka MPYC da pynbaad u leh wa kiwa yahkhmat ka Congress ki kwah ki wow biah sia-lieh ya ka mynried ki khon khynroo deiwa pynrap wa kam ki khynroo ki em ki ha ka Party wow chakri ya ki para bru, tangwa katni won sñiawsih wa ki emkaam ki du ya kiwa em poisa.
Neiliang uwi won uwa yahkhmat ki khynroo, da ong u wa ki 12 MLA da mih noh ym toh ki soh-pyut tangwa kiwa ye wow yahkhmat ya ka Party, wei ka yakhun pyrchah yong kiwa yahkhmat ka Party ya ki 12 ngut da pynchrai hanla ym em mut ki wow mih noh na ka Party.
