Ynne ka sngi u Montri ka chnat i chait i khiah ka jylla, u James Sangma da ong u wa da sdang yei e tika yada COVID-19 wa kyrpang neibynta ki bru kiwa artatien (Vaccine Hesitancy) hapoh ka jylla.
Da ong u wa man iwa sñiawsih wa ki bru sñiawthooh bakla ki hajrong i tika weiwa ka Social Media wa ka Internet da ktah bha ko heini wow pynpoor ya ki yutip wa bakla wei ka sorkar da yaleh ko wow pynche hajrong ini i sñiawthooh bakla.
Chooh chooh da ong u wa i chim tika toh i mon samen yong ki bru wei emkaam leh wow pyrkhat ki ym du ya ki samen tangwa wot ya ka yung ka sem, ki lok ki jor wa kiwi kiwi kamtæ emkaam u man ki ki bru kiwa bahkhlieh.
Da kyntu u leh ya ki paidbah wow wan chaphrang wow chim tika wei ymtoh u man kiwa ngait ya ki khubor hamsaya wei ka sorkar dei langær pynche ko hajrong i myntoi wow chim tika.
Ka sorkar Meghalaya da dep ko wow booh thong wow pynyoh tika cha waroh kiwa da biang rta chwa wow kut u snem tangwa kamwa man kattæ da em du 58.1% kiwa da dep yoh tika kiwa chisien kiwa em 11 lak tam katwa ka thong toh 20 lak tam.
Ka West Jaiñtia Hills leh man ko kawa em hei wa ar wa duna dooh kiwa yoh tika wei kawi na ki District wa em hapoh 50% kiwa da yoh tika.
Puræ leh: Da tam 20 lak sien wa da e tika yada COVID-19 hapoh Meghalaya
