Ynne ka sngi hawa kylli na u Montri ka chnat puræ puthi ka jylla, u Lahkmen Rymbui lada em i thmu ka sorkar wow pynskem pura (Regularise) wei wow pynku ya ka tulop wa da su ya kiwa sikai (Contract) ha Kiang Nangbah Government College iwa man iwa duna bha. Da ong u i kylli wow Regularise ym mih ko namo ymye wow pynskem pura ya ki lait na i pynku ya ka tulop yong ki.
Da pynrap u deiwa ong wa hajrong i pynku tulop dei langær jooh wan ki seiñ kiwa da jooh klam wa oo wei man i iwa eh neibhah wa hapoh ka chnat wa em kiwa yoh tulop katkam ka UGC Scale kiwa da yoh T. 1 lak tam, em kiwa yoh ya ka State Scale yoh ki duna T. 1 lak chi bnai katwa kiwa sikai ha ka Morning Section won yoh tulop ki du T. 5,000 chi bnai.
Heijooh i por da paan por u leh neibynta ka sorkar khnang wow ye ko u leh yeiwa emkaam.
Heiyatoh won wa i por wow ye u pynku ya ka tulop kiwa sikai ha ka Morning Section, u Lahkmen da ong u wa ki 3-4 snem toh i por wow ye u chim rai ya ka sorkar tangwa em i por won wa wan noh da kiwi ki kaam kiwa rap dawa smat.
Da ong u leh wa u chim ya i rai wa smat man iwa eh tangwa u pynkrehkaam won deiwa kyrmen skem leh wa daw leh yeiwa emkaam khnang wow myntoi kiwa sikai kamjooh leh kiwa chah sikai.
