theme-sticky-logo-alt
theme-logo-alt
Advertisement ad1

Da wai yaka Vocational Training Centre ha Khliehtyrshi

Ynne ka sngi yaka Vocational Training Centre yong ka chnat Animal Husbandry & Veterinary ka sorkar jylla kawa em ha Khliehtyrshi, West Jaiñtia Hills District da wai paidbah yaka hadien i sahteiñ wow pynkrehkaam ka nadooh u snem 2014, heiwa da em i por wot neiliang ka chnnat krehkraam AH&Veterinary leh da thmu ko wow ekti noh cha kiwi ki chnat krehkaam neidaw wym ye de u lai chakhmat heiyatoh wa kani ka Training Centre.

Hawa pynsñiaw yei lai luti yong kani ka Training Centre, u Dr. K.B. Sahkhar, Director Animal Husbandry & Veterinary ka sorkar Meghalaya da khana u yei daw toh wa duna poisa ka sorkar wei ym ye de u pynkrehkaam wei suki suki da ieh beiñ najrong i chim kabu ki bru.

“Kamtæ hei lai luti ka chnat krehkaam deilang i booddien u MLA wa katni, ha u snem 2020 ka sorkar da ap ko yei dawa yong i wei da ye wow lai chakhmat,” khana u Dr. K.B. Sahkhar.

Kani ka Vocational Training Centre toh yow e sikai yaki khynroo khyllood heiyatoh wa i ri mrad, wei lyngba kani ka Training Centre u Director khana u wa dang yakhun ki katni wow yoh yaka Affiliation namo i tipmit naka sorkar India, kamjooh leh ka Certificate wa yoh na kani ka thaw wow man ko kawa da tipmit da waroh kawi ka ri India.

Chooh chooh da pyntip u wa i yarap naka sorkar jylla neibynta i ri mrad ymtoh wa da duna i, tangwa deiwa pyndep ya kini ki chah sikai, em boon ki thaw wa e yarap poisa naka sorkar India wa kynthup lyngba ki Bank wa kiwi.

Ki yarap ha kini ki sngi wymtoh de 100% ka ram, deiwa e nongmuna yaka Piggery Mission kawi naki thong krehkaam wa heh wada sdang haka jylla, heiwa ka sorkar da chim ram ko hadooh T. 200 klur wei e cha ki paidbah khlem ka sut dei thmu u e myntoi sakhiat ya kiwa psan mrad kawa man leh ka laad e khih e kreh.

Neiliang u kongsan u Wailadmiki Shylla hawa e yei klam ong u wa lada ki khynroo, ki paidbah ka Ri-loom Jaiñtia ym wan ki chakhmat da man i sepai i kreh chitom u wow wanrah ya kani ka Training Centre.

“Hadien wa da chimkti O kam u MLA ka Jowai, chem O chiboon ki kreh wa sahteiñ ymtip neiyi i daw, kamtæ nga won da pyrchang O katwa ye u pyndep yeiwa sahteiñ wei ini i wai ynne ka sngi leh toh kawi na kawa sahteiñ,” ong u Wailadmiki Shylla.

Najrong wa pynsñiaw u ya kiwi won ki kreh wa sahteiñ ki wym slem de da wai yaki, da kyntu haroh u yaki paidbah wow wan chakhmat heiyatoh wow ri mrad.

Heiyatoh wa i duna ki bru na Ri-loom jaiñtia wa chim yei kaam ri mrad, kyntu u yaki sahep wow tih bniah hajrong ini wa neiyi i daw, toh hi mo wa duna i yoh yutip ki namo wym em hi sñiawsuk ki, neibhah katkam i yoo yong oo boon hi ki bru wa thooh khih thooh kreh.

Kiwi won wa e yei klam kynthup ya u Lakhon Dkhar, MDC, u Waheh Chnong Khliehtyrshi, u Kitbok Rymbai, u Dr. D.I. Kjam wa kiwi.

Advertisement ad1
Share this:
Previous

Yap u khlieh dooh ki chipai ka ri deilang waka kurim u hadien wa haap ka Helicopter

Next

Daw chim rai wow pynku tulop ya kiwa sikai Morning Section ha KNGC: Lahkmen