Ynne ka sngi u Montri Rangbah ka jylla, u Conrad K Sangma, chirup wa u Chief Adviser, u Thomas A Sangma, Govt. Chief Whip, u Marcuise N Marak, u MLA ka Siju-Rongara, u Rakkam A Sangma wa u West Garo Hills Deputy Commissioner, u Ram Singh, da booh mooyurim u ya ka Eco Resort yong ka chnat uiñke suwari ha chnong Sakal A.duma ha Nokrek Biosphere Reserve.
U Conrad hawa e yei klam da ong u wa kani ka Resort daw man ko kawa miat tam na ki Tourist Resort ha ka thaaiñ mihsngi ka ri heiwa u chna ya ka ha i lut wa T. 23 klur wei daw pyndep ya ka hapoh chi snem.
Da ong u wa i pynku ya i kaam uiñke suwari chong i hei kyrchaan na ki paidbah wei kani ka kreh u man ko ka yong ki paidbah heiwa ka jylla da yoh ko T. 700 klur na ka JICA wow pynku ya ki kaam uiñke suwari hapoh ka jylla heiwa mar T. 350 klur u yoh ka Ri-loom Khasi wa ka Ri-loom Garo.
U Thomas A Sangma hawa e yei klam da ong u wa kani ka Resort daw em ko ya ka Information Centre wow e yutip ya kiwa wan uiñke kamjooh leh kiwa wan puræ bniah deiwa kyntu leh ya ka chnat Agriculture wa ka Veterinary wow wanrah ya ki Scheme ha kani ka thaaiñ.
Neiliang u Ram Singh da e u ya ki kyntien pdiang burom, heiwa da yoh leh i klam na u Nokma ka Sasatgre katwa ka Tourist Officer, Ava Shereen Sangma, da e ko ya ki kyntien khublei.
