Ka United Democratic Party (UDP) ha Mawthadraishan Constituency da piah ko hadien wa yut noh kiwa yahkhmat wa na khmat wow lai psiah noh cha ka NPP, wei ini da man ko iwa dooh wa khroo ya u MLA, u Brolding H Nongsiej uwa man leh u Montri ha ka sorkar MDA.
Da em 14 ngut kiwa yahkhmat na Mawthadraishan kiwa lai psiah cha ka NPP ynne ka sngi, wei ya kini ki dkhot da pdiang sñiawbha da u National General Secretary ka NPP, u James K Sangma deiwa emlang kiwi de kiwa yahkhmat ka Party NPP ha ka yung krehkaam ka Party ha Lauchumiere ynne i janmiet.
Napyrdi kini ki 14 ngut, 7 ngut toh kiwa yahkhmat dooh yong ka UDP Mawthadraishan katwa kiwi kynthup lang ya kiwa yahkhmat na ka Party HSPDP, Congress wa BJP. Ha kani ka thup, ka Irin Lyngdoh, MLA warim ka Pariong leh da mih pyrtuid wow lai yei kyrchaan ya ka NPP.
U James K Sangma hawa klam ha ka yalang wa tbian yow pdiang burom ya kiwa da wan wan pynyabi cha ka NPP da pynsñiaw u yei kmen wa khroo wa da chim ya ka rai wow wan e kyrchaan ya ka Party.
Neiliang u Phillip Warjri uwa man uwa yahkhmat ka UDP Mawthadraishan da pdiang u wa i lai pynyabi cha ka NPP man ko leh heipor wa jwat neibhah wa u MLA uwa da pynjop ki toh uwa da man katni kam u Montri ka sorkar jylla.
Uwi won uwa yahkhmat, u Wally Sohlang uwa man u Vice President ka UDP Mawthadraishan Constituency da ong u wa nadooh wa em ha ka Party UDP ha u snem 2010, da em chwa arliang kitæ ki yong u H Brolding Nongsiej wa yong u JC Diengngan wei ya ki ym em da kheiñ kam ki dkhot yong ka Party UDP tangwa da kheiñ kam kiwa kyrchaan yong u MLA.
