Ka United Democratic Party (UDP) da pynsñiaw ko yei artatien wa ki paidbah u pdiang ki ya ka All India Trinamool Congress (AITC) hapoh ka jylla khamtam hapoh Ri-loom Khasi wa Jaiñtia.
Neiliang u General Secretary ka UDP u Jemino Mawthoh da pynsñiaw u wa wot kam ha ini i por ka Congress da em ko hapyrdi i wym biang næ skem, tangwa dang rap paaw wei da tipmit bha ya ka bar ya ka AITC.
Da pynsñiaw u wa ka AITC krehkaam bha ko du ha West Bengal wei yoh ko yei kyrchaan du ha ki kattu katni ki jylla kam ha Tripura, Manipur tangwa kam ka seiñ ym em u ye ko u pynyaar cha kiwi ki jylla.
Da ong u wa ympu tikna che wa ki paidbah u kyrchaan ki ya ka AITC tangwa i man i long ka seiñ hima sima ha Meghalaya hi toh wa ki paidbah jied ki ya u bru ym ya ka seiñ heiwa da ong u leh wa ymye wow ong neibynta u Dr. Mukul Sangma neibhah wa man u u bru uwa da paaw bha wei uwa da mihkhmat da slem ya ka Constituency wei lada jop ki ya ka Election toh neidaw ka AITC lane na oo samen hi.
Ha iwi won i liang da ong u wa ini i jia wa i long i man ha ka saiñ hima daw man ko ka kabu wa khroo ya ka UDP neibhah ka Congress hapoh ka jylla leh da kylla man ko du kam ka seiñ wa dang im ha Ri-loom Khasi wa Jaiñtia hadien wa ym em de ko ya kiwa mihkhmat paidbah ha Ri-loom Garo.
