Ki 20 tylli ki manyung wa duna ha i yoh i laa ha ka chnong Nongkhroh, West Jaiñtia Hils District da yoh pdiang ki ya i e sñiawbha u MDC ka Ummulong-Moodymmai u Jesse Suiam.
U Jesse Suiam da e sñiawbha u da ki Tin ar ban cha kini ki manyung wei da e u leh 20 tylli ki Pump siat khñiang cha ki warep kani ka chnong lyngba ka Scheme Special Assistance Grant (SAG) yong u snem 2020-2021.
Hajrong kani ka Scheme SAG yong u snem 2020-2019 da chna leh ya ka thaw sait-that namo ka Washing Platform kawa em ya i thaw rieh slap wa ka um dih ha i lut wa T. 3 lak.
Ya kini ki Tin wa ki Pump wa ka thaw sait-that da saam wei da pynlait paidbah ha ka yalang wa tbian ha kani ka chnong ynne ka sngi hei emlang u Waheh Chnong ka Nongkhroh u Elvin Mynsong, u Waheh Chnong ka Moodymmai u Joseph Pariat kiwa kitkaam chnong wa kiwi kiwi.
U Jesse Suiam hawa e yei klam da ong u wa i thmu wa kongsan tam wow e ya kini ki Scheme toh chibynta wow yarap ya ki manyung kiwa em hapyrdi i duna ha i yoh i laa wow pyndap pynbiang yeiwa emkaam ki.
Neiliang kiwa chong chnong da dap ki dei sñiawkmen wei da e khublei ki leh ya u MDC wa da chimkhia u ya i eh i khoo yong ki paidbah ka chnong.
