I dawa pynkrehkaam ya ka Inner Line Permit (ILP) ha ka jylla Meghalaya wa da sahteiñ wa ka sorkar India kattu da palat ar snem nadooh wa ka jylla da mynjur lang ko ya ka Resolution hapoh ka yung dorbar chna aiñ ha ka 19 tarik Kmaichonglad (Dec) 2019.
Hawa kylli hajrong ini i dawa, u Symbood Montri Rangbah ka jylla, u Prestone Tynsong da ong u wa dang im hi i dawa wow pynkrehkaam ya ka ILP hapoh ka jylla.
Da ong u wa neiliang ka sorkar jylla hawa yohlaad ko man-i-por wa yachem wa u Montri ki kaam pohyung ka ri da pynkynmoo wei da pynbor wow pynkrehkaam ya ka ILP katkam wa kwah ki paidbah ka jylla.
