theme-sticky-logo-alt
theme-logo-alt
Advertisement ad1

Le sngi booh por pynbait pood chwa u lai yachem wa u Amit Shah

U Symbood Montri Rangbah ka jylla, u Prestone Tynsong da pyntip u wa da booh booh por le sngi ya ki waroh ar tylli ki sorkar wow phah ya ka Report wa bniah hachwa wow chim yei rai wa khaddooh hawa yatoh wow pynbait ya u pood u ang hapyrdi ka jylla Meghalaya wa Assam.

Ka yalang yong ki ar ngut ki Montri Rangbah, u Conrad K Sangma wa u Himanta Biswa Sarma kawa da man ynnin ka sngi da rai wow rah biang yei yaklam sa chisien wei hadien itæ daw hær won cha Delhi wow pyntip ya u Union Home Minister hajrong i rai wei ka bui (Report) wa da yoh neibynta wow pynbait noh yei kajia pood ha ki 6 tylli ki thaw napyrdi ki 12 tylli ki thaw khappood.

Hawa klam wa ki laad pathai khubor, u Prestone da pyntip u wa i booh por wa le sngi da sdang nadooh ynne ka sngi, wei neiliang ka sorkar Meghalaya da pynsñiaw wa ka kwah ko wow pynbait noh ya ki 6 tylli ki thaw hachwa wow lehkmen yei dap 50 snem wa yoh ya ka jylla.

Hawa kylli yei pynjlan biang wow rai hajrong u pood u ang, u Prestone da ong u wa hadooh katni da em hadooh 4-5 tylli ki yalang yong ki ar jylla wow pynbait noh ya ki khappood, tangwa ym toh iwa suk wow pynbait du hapoh i yachem wa 4-5 sien, neibhah ini i eh ha khappood toh iwa da slem wei wa emkaam chiboon i yaklam yatai.

Hawa kylli chooh chooh wa ya toh mih i wym hun na kiwa chong chnong ha khappood, u Symbood Montri Rangbah da ong u wa emkaam wow klam chwa katni wow leh kammon wei lada em i wym hun, wei lada em kam itæ leh daw yaklam biang hadien, heiwa da pynrap wa kamwa man katni ka sorkar ka em kyrmen wa i pynbait ya u pood u ang man ko kawa lai bait.

U Prestone da ong u wa hadien i yachem yong ki Montri Rangbah ya u Union Home Minister, u Amit Shah, neiliang yong waroh ar ki sorkar jylla daw pyntip paidbah ki ya i rai lyngba ki laad pathai khubor.

Share this:
Previous

Dang im i dawa pynkrehkaam ILP ha ka jylla: Prestone

Next

Ki paidbah wow bichaar wow jubab yeiwa pynbaad ka AITC: Prestone