U Montri ka chnat puræ puthi ka jylla, u Lahkmen Rymbui da ong u wa ka sorkar ym em u kylla wyrngaiñ ko ya i dawa kiwa sikai Adhoc deiwa ong wa ymtoh iwa suk ya ka sorkar wow pynman kaam wut-wut ya i dawa wow pynku kyrdan cha ki Deficit. Da ong u wa i kaam neibynta ini i dawa da lai i chaphrang deiwa pynrap wa ymye u kular iwon iwon hajrong ini.
Kiwa sikai Adhoc hapoh ka Federation of All School Teachers of Meghalaya (FASTOM) ynne ka sngi da pynman ki ya i yakhih wa syndet haphrang ka Secretariat wow pynkynmoo ya ka sorkar yeiwa kular ko nadooh u snem 2019 neibynta wow khut yaklam ya kiwa sikai wow pynku kyrdan noh ya ki 7,090 ngut kiwa sikai Adhoc na kylleiñ ka jylla kam kiwa sikai Deficit.
Hawa kylli, u Montri da ong u wa i dawa yong kiwa sikai Adhoc ymtoh iwa dang thymme wei ka sorkar ymye ko wow kular wow khut yaklam biang ya kiwa sikai, tangwa ka dwar ka sorkar man ko kawa wai bait neibhah ha ki por wa dadep leh da jooh yachem teiñ ko wa kiwa yahkhmat ki seiñ kiwa sikai wei emkaam leh wow sñiawthooh ki iyi iwa ye wow leh wei iyi iwa ymye.
U Lahkmen da ong u wa ka sorkar ym em u mylliñ ko ya waroh ki phang hapoh ka jylla wei ymtoh iwa suk wow chim rai jhan donhi neibhah wa hap wow bichaar bniah khnang wa iwon wa rai u man i katkam i kular.
Puræ leh: Syndet mih ka FASTOM haphrang Secretariat wow dawa pynku Deficit ya kiwa sikai Adhoc
