U Montri ka chnat Pynroi Sor wa ka Municipal, u Sniawbhalang Dhar ynne ka sngi da ong u wa ya katni dang yang chwa ya ka bui (Report) na u Deputy Commissioner (DC) ka Ri-Bhoi hajrong i pyrchah yong kiwa chong chnong ka Kyrdem ya i thmu wow booh ya i thaw thæh jhep ha Mawlawai, Ri-Bhoi District.
Kam wow kdaw heini neiliang kiwa chong chnong ka Kyrdem, Mawlawai wa Sohriewblei ha ka sngi walang ka tayaw wa dadep da mih paidbah ki wow pyrchah ya i thmu wow booh ya ka thaw thæh jhep (Solid Waste Management) kawa da thmu wow booh ha khappood ka chnong Mawlawai wa Kyrdem.
Hajrong ini i pyrchah, neiliang u Montri da ong u wa ya katni ympu ye wow ong iwon iwon tang wow yang chwa ya ka bui kawa pura ka wow phah da u Deputy Commissioner ka Ri-Bhoi District.
I thooh thaw neiliang ka sorkar da lai i chakhmat neibynta wow booh sa iwi i thaw thæh jhep wei neiliang ka sorkar ym leh jhan ko wei u pyndep ko iwi hadien iwi wei daw pyrchang katwa ye wow pyndep noh.
Hawa kylli ya i daw wa pyrchah ki paidbah ya ini i thmu, neiliang u Sniawbhalang da ong u wa yeini ki paidbah wa pyrchah wa ye bha u jubab ya i daw, wei neiliang yong oo da ong u wa daw yang ya ka bui wa pura na u DC.
Katkam wa man hi ki paidbah ki le chnong ymtip ware ki hajrong ini i thmu deiwa pynbaad wa u Rangbah Shnong warim wa uwa thymme ka chnong Kyrdem, da ebor (No Objection Certificate) sop-sop ki khlem pyntip paidbah.
Puræ leh: Hiar lai pait u Sniawbha ya ka Marten
