Neiliang ki pulit ka Meghalaya da phah ki ya ki paidbah wow man kiwa husiar lada em ki bru wa Phone kiwa kam toh ki wakreh ha ki Bank wei da Phone ki neibynta ka KYC (Know Your Customer) deiwa ong wa ym krehkaam de ka KYC yong ki lane wym hoi de ki Mobile Wallet namo ki App wa phah poisa ki.
Kiwa chim kabu daw ong ki wa ym krehkaam de ka Account kat wym ye ki wow pynthmme ya ka KYC wei yow ye u leh yeini da phah ya ki bru wow Download wei wow Install ya uwi u App deiwa pynyoo thij-pa-thij kammon wow leh yeini.
Tangwa kani ka App pynyoo ko cha uwa Phone ya ka Screen ka Phone wei daw phah ya kiwa chah Phone wow phah poisa kajiak cha ka Mobile Wallet ki wei heipor wa leh yeini da yoo lut u ya ka Password, User Name wa kiwi de heiwa oo leh ye u wow phah poisa pyn cha oo hi.
Lyngba kani ka App ye ki leh wow yoo ya ka OTP wa yoh haka Phone ki bru yow ye ki wow phah poisa naka Account yong kiwa chah Phone cha kiwi.
Deiwa e daw leh wa hap wow pynthymme ya ka KYC, boon ki bru wa da chah thok heiwa ki bru da khana lut ki cha kiwa Phone nadooh ka Account Number, ki Number ka Debit/Credit Card wa ki CVV Number tangwa kini kiwa chim kabu da sai pathan ki da ka poisa na ka Account ki bru hadien wa ki bru da khana ki leh ya ka OTP heiwa kini kiwa Phone da ong ki wa lym khana ya ka OTP ym ye wow pynthymme ya ka KYC.
Neiliang ki Bank da jooh phah pynthymme ki ya ka KYC na ki por cha ki por tangwa da phah wan ki da ki bru cha ka Bank wei ym jooh leh ki deiwa Phone yow lait u wan cha ka Bank. Ka KYC toh yow pyntikna yei thaw sah ki bru, yow pyntikna yei email, i Phone Number, i rukom soi pyrtuid lada kiwa em Account da pynkylla ki ya kini waroh wei da phah rah leh ya i dur wa ki ID kam ka PAN Card wa EPIC. Tangwa ym jooh em phah leh yeini Online lane deiwa Phone dei Phone tangwa hap bait wow lai leh yeini hapoh ka Bank.
