U General Secretary ka Hill State Democratic Party (HSPDP) uwa man leh u Montri ha ka sorkar jylla, u Renikton Lyngdoh Tongkhar da ong u wa ka phang Reservation Policy yong ka Meghalaya man ko kawi na ki phang kawa hap wow yaklam, neibhah man ko kawa khia bha hadooh kattæ kattæ.
Da ong u wa hawa pait hajrong i em yong kiwa chong chnong, da yoo wa ki jaitbru Khasi wa Jaiñtia da rap boon ki hawa nujor wa ki Garo wei ym du ini, tangwa wot ha ka liang ka puræ puthi le ki Khasi Jaiñtia man ki hakhmat bar ya ki Garo.
Da ong u leh wa lada pynngat lang ha kajooh ka Percentage ya ki Khasi Jaiñtia wa Garo, ki Garo ym poi næ yoh ki wow psiah cha kiwon kiwon ki bynta la ha ka puræ puthi næ kiwi won.
Hawa pynsñiaw yei sñiaw samen hajrong kani ka phang, u Renik da ong u wa hap wow pait wei ya pyrkhat bniah bha ya kani ka kaam hapoh ka seiñ neibhah ym ye wow ong kamni kamtai hi-eh da iwi i sur tangwa wow yoh lang ya i sur yong waroh ki dkhot wa yahkhmat ka seiñ.
