U Montri Rangbah ka jylla, u Conrad Kongal Sangma da ong u wa ka dwar ka sorkar man ko kawa wai neibynta wow yaklam yasuk wa ka seiñ kieñ suloi Hynniewtrep National Liberation Council (HNLC), tangwa i yaklam toh u man i iwa khlem da booh kyndon.
Hawa yaklam wa kiwa pathai khubor ynne ka sngi, u Conrad da ong u wa ha ki 3 snem wa dadep ka sorkar da yaleh ko wow yaklam wa ka HNLC, wei neiliang ka seiñ da booh kyndon ko neibynta wow poi cha i yaklam yasuk.
Chooh chooh da ong u wa ka sorkar India da pynsñiaw ko wa ya ki kyndon wa booh ka HNLC ymye wow pdiang ya ki wei ka sorkar jylla leh da phah ktien ko wow wan chwa ki cha ka miej i yaklam khlem kiwon kiwon ki kyndon.
Heiyatoh wa i dawa poisa ka HNLC na ki baar jylla, neiliang u Conrad da ong u wa kam ini da jia i ha ki por wa dadep, wei hadien wa chimkhia ka sorkar da ye wow pyndooh yeini, wei ha kani ka kynti ka sorkar daw chimkhia ko neibynta i chngaaiñ kiwa wan mylla kiwa em hapoh ka jylla.
Heijooh i por da kyntait u yei tlot ki pulit hajrong i pdung Bomb, deiwa ong wa em chiboon ki yutip wa yoh ki pulit tangwa emkaam u pait ya kiwa rap jhan wei ki paidbah emkaam u sñiawthooh ki wa ki pulit da khanglaad ki hadooh 99.9% i jia, deiwa pynksan leh wa ymtoh wow pynbaad du ya ki pulit neibhah da leh ki yei kaamram yong ki wei ki pulit ka jylla man ki leh kiwa khlan katkam wa man katni deiwa yohkem ya ki bru wa emkti du hapoh kattu katni por donhi.
