Ka Minister for Finance and Corporate Affairs, ka Nirmala Sitharaman hawa wanrah ya ka mang tangka namo ka Union Budget 2022-23 ka sorkar pyrdi ynne ka sngi da pyntip ko wa da booh bhah T. 60,000 klur neibynta ki 3.8 klur tylli ki manyung hapoh ka Har Ghar, Nal Se Jal Scheme.
Da ong ko wa nadooh u 2014 ka sorkar da yaleh ko wow pynkupbor ya kiwa chong chnong khamtam ya kiwa dooh wa duk wa kitu kiwa em cha rood cha kdong ka imlang sahlang. Ini da kynthup ko nadooh wow yarap poisa yow chna yung, u pynyoh bordiñ, ka LPG waka umkor.
Da khana ko leh wa hapoh ka Har Ghar, Nal Se Jal; na ki 8.7 klur tylli ki manyung wa em hapoh kani ka Scheme da em 5.5 klur ki manyung kiwa yoh umkor ha kini ki 2 snem wa da dep.
Da pyntip ko leh wa hapoh ka Pradhan Mantri Awas Yojana (PMAY) da booh bhah T. 48,000 klur yow chna pyndep ya 80 lak tylli ki yung ki bru kiwa da chah jied wow yoh myntoi naka PMAY kiwa em ha sor wa cha palat sor ha u snem 2022-23. Daw ya krehlang ka sorkar pyrdi waka sorkar jylla yow pynyoh yei thaw wa ki tiar ki tar wa emkaam wow chna yung wa duna dor cha kitu kiwa rap tlot.
Daw chna pynmiat leh ya 2 lak tylli ki Anganwadi hapoh ka Har Ghar Nal Se Jal hei dor wa T. 8.7 klur.
