Ka Minister for Finance & Corporate Affairs, ka Nirmala Sitharaman ynne ka sngi da pynbna ko yei wow wanrah da ka Digital Rupee kawa daw pynmih da ka Reserve Bank of India nadooh u 2022-23. Yeini da ong ko hawa wanrah ya ka mang tangka namo ka Union Budget 2022-23 ka sorkar pyrdi hapoh ka Parliament.
Da ong leh wa kani ka Central Bank Digital Currency (CBDC) daw yarap ko wow pynku ya ka Digital Economy. Kamtæ kani ka poisa wa tip kam ka Digital Currency daw yarap ko wow pynsuk ya ki kaam poisa poilaiñ wei daw pynduna yei lut phut hawa pynlai pynwan ya ka poisa. Da pyntip ko wa kani ka Digital Currency daw pynemkaam ko ya ka Block Chain wa kiwi ki stat Technology.
Heiyatoh waka Digital Banking, ka Nirmala Sitharaman da ong ko wa hi ki snem wa da lai, ka Digital Banking, ki Digital Payment wa kiwi ki kaam wa yatoh wa ini da heh da san ki smat bha hapoh ka ri. Kamtæ ka sorkar leh da pynchlur ko ya kiwa emkti ha kini wow pyntikna ki wa ka Digital Banking u poi ko cha waroh ki kdong ki chmiang ka ri deiwa suk ki bru wow pynemkaam.
Kamtæ kam chibynta i lehkmen dap 75 i yoh laitlooid ka ri, ka Finance Minister da pynbna ko yei thmu wow sdang ya 75 tylli ki Digital Banking Units (DBUs) ha ki 75 District ka ri da ki Scheduled Commercial Banks.
Sa iwi i pynbna wa emkaam, ka Finance Minister da ong ko wa ha uni u 2022, 100% ki 1.5 lak tylli ki Post Offices daw em ki hapoh ka Core Banking System yow yoh ki wow leh Net Banking, Mobile Banking, ATM wei yow ye u leh ya ka Online Transfer ya ka poisa na ki Post Office Accounts wa ki Bank Account. Wei ini daw yarap ki ya ki warep, kiwa da heh rta wa em ha ki thaw palatsor wow yoh ki wow pynemkaam ya ki chakri wa e da ki Bank.
