Ka Ampareen Lyngdoh kawa man leh kam kawa yahkhmat ka Congress Legislature Party (CLP) da yong wa ym yut tooh ko napoh ka Party wei ka u man bait ko kam ka MLA ka Congress na East Shillong wei ym psiah na kiwon kiwon ki dwar dien kam kawa tooh heipor miet wei ym chet kylla ko ya kiwa kyrchaan yaka wei ya iwa da pynkit ha ka.
Yeini da ong ko hajrong iwa da klam kiwa boon wa daw psiah noh ko cha ka National People’s Party (NPP) chwa ka Election MLA ha u 2023. Ini leh toh hadien wa u kurim ko uwa man kam u MDC na Malki-Laitumkhrah, u Fantin Joseph Lakadong da rai u wow mih noh naka Congress yow psiah cha ka NPP.
Hajrong ini, ka Ampareen da ong ko wa kam u MDC hei sien wa nyngkong da sñiaw u yei chah ksih ki kaam pynroi wei yeiwa emkaam u ya ka Constituency yong oo kawa da haap ha ki 5 tylli ki Constituency MLA wei yeiwa pyrkhat u toh palat yeiwa ye ko wow ong iyi iyi leh.
Da ong ko leh wa ym jooh em kdooh khom ya ki MDC yong ka hanla iwa leh ki ktah i yaka ha ki kaam saiñhima.
Heiyatoh wa daw em kiwi de kiwa yahkhmat ka Congress kiwa daw yut, da kyntait ko wow ong iyi iyi leh deiwa pynrap wa ym pynchlur ya kiwon kiwon wow yut ki wei ym kyrchaan leh ya kawon kawon ka liang kiwa da kwah wow pynyieñ ya uwon uwon wa hap u ya bood lang, deiwa yooluti leh wa iwon iwon iwa rai ko ym pynkulmar tangwa wanrah ko yei yatylli.
