Ki MDC ka Khasi Hills Autonomous District Council (KHADC) hapoh i yahkhmat u Chief Executive Member, u Titosstarwell Chyne da paan ki yei pynche na u Montri Rangbah, u Conrad Kongal Sangma heiyatoh wa i em ka Village Council ha i pynkylla (Amendment) ya ka Sixth Schedule.
Hawa yaklam wa kiwa pathai khubor, u CEM da pyntip u wa neiliang u Montri Rangbah da klam che u wa i pynkylla da chim lang ya i yumut wa da e da ka KHADC, wei ha i kyntien Village Council da booh lang leh wa i kyntien Village Dorbar. Da ong u wa ini mut i wa ha Khasi-Jaiñtia ka Village Dorbar u krehkaam ko katwa ha Garo Hills u pynkrehkaam da ka Village Council.
Da ong u wa katni da che wa ka sorkar ym em u leh ko iwon iwon iwa bakla, tangwa da leh ko katkam i e yumut ka Council.
U Titos da ong u wa u Montri Rangbah da khut u wow lai lang cha Delhi wow rap yoh yei che, khnang wym em i leh bakla na ka Ministry heipor wa mynjur ya i pynkylla.
Hawa kylli, u CEM da ong u wa ka KHADC da paan pynche ko wa ym em i khleh lang boon tylli ki chnong neibynta ka Village Dorbar, wei kamwa man katni i jied ya kiwa yahkhmat chnong u man bait kamwa jooh leh lyngba ka District Council.
