U Montri Rangbah ka jylla uwa man leh u National President ka National People’s Party (NPP), u Conrad Kongal Sangma ynne ka sngi da ong u wa ka sorkar daw pait ko kiyi ki kaam wa ye wow e cha ki 5 ngut ki MLA ka Congress kiwa da psiah lang cha ka sorkar synrop Meghalaya Democratic Alliance (MDA), heiwa da pyntikna u leh wa ym em iwon iwon i pynkylla ya ki Montri sorkar.
Hawa kylli hajrong i wit ka BJP ya ka Congress wow emlang ha ka sorkar, u Conrad da ong u wa ki heh ka BJP toh u sñiawthooh ki wa ki MLA ka Congress da phah ki ya ka chithi wa kyrchaan pura ki ya ka sorkar hajrong ki bynta wa emkaam ka jylla wei ymtoh u chah ktah hiwot i emyatoh wa kiwi ki seiñ kiwa emlang ha ka sorkar.
Da ong u wa ki seiñ saiñpyrthai ymtoh u pyrkhat ki da iwi tawon tangwa da toh u pait ki ya ini ha iwi tawon i liang iwa bha heiwa da wanlang kiwa mihkhmat wow krehlang neibynta i jooh i kaam.
