Ka seiñ Jaiñtia Students’ Union-Southern Border Zone (JSU-SBZ) da e khublei ko ya u MLA ka Khliehriat uwa man leh u Montri ka sorkar jylla, u Kyrmen Shylla wa da chimkhia u wow phah chna pynmiat ya ka sarok Rymbai-Bataw-Borghat Road, hapoh East Jaiñtia Hills.
Ka seiñ da ong ko wa i chna pynmiat ya uni u sarok da lai i chaphrang wei dei chimkhia u Kyrmen Shylla da pynsuk i ya i rukom im ki ha i lai i wan khamtam heipor wa kit ya ki mar rep.
Chooh chooh ka seiñ da maham ko ya ki Truck kiwa kit palat pood khamtam kiwa kit Coke wa Flyash na ki karkhana wa em ha Wah Deinling.
Heijooh i por ka JSU da ong ko wa ka seiñ daw pynchitom ko ya kiwon kiwon ki kari kiwa leh pyrchah ya ki kyndon wa da booh khamtam kiwa kit palat pood neibhah u sarok toh u thied snaam wow pynim ya waroh ki paidbah.
