Ka Khasi Students Union War Jaintia Circle da lai booh ko yei dawa ha u Deputy Commissioner, West Jaiñtia Hills District wow tuklar wei wow wanrah chisyndon yei chongsuk chongsaaiñ ha ki bynta khappood hajrong i wan toor pood ki BGB (Border Guard of Bangladesh) deiwa tia chadooh u pood u ang yong ka chnong Muktapur wow pynthut ya i kreh i ktah kiwa chong chnong ha Muktapur.
Ka seiñ wa ki bor chnong ka Muktapur ha ka 4 tarik uni u bnai da lai ki cha kani ka thaw yow yoo yeiwa sakhiat hajrong i leh ka Bangladesh yeiwa chah khanglad ka chnong Muktapur ha ki chipai BGB wow pynkreh ya u dooid Side-Drain ka madan bol kawa dang haap hapoh u pood u ang ka India heiwa neiliang ki chipai ka BSF da paitke ki khlem da tuklar yeini.
Da kdaw leh wa ki nong Bangladesh da wan thung ki da u kba u jhoor ha ki thaw wa da kreh da kiwa chong chnong ka Muktapur.
Da pyntip leh cha u DC wa ki BSF da khang ki wow pynkreh ya katai Scheme MGNREGA ha i por sngi wei da phah kreh ha i por miet ha katai ka chnong. Wei ini da man ko iyi iyi wa em cha lyndet neibhah kiyi wow kreh heipor miet.
Neiliang u Deputy Commissioner da ong u wa da yoo yei lai ka KSU ha kini ki sngi wa da dep du ha ki Social Media tangwa ym em poi cha oo da ki kot ki sla (Official Document) wow leh iyi iyi hajrong ini, tangwa da kular u wow chimkhia wei wow takit wei ya ki bui (Report) hap poi cha oo nadooh ka yung krehkaam u Block Development Officer ha iwon i rukom wa pynkreh ki ya ka MGNREGA ha Muktapur wei lada toh sakhiat heipor miet. Wei daw khut yalang u leh wa ki heh ka BSF yow yoh yei pynche kawa biang hajrong ini.
Neiliang u Deputy Commissioner da ong u wa lada toh ha ka kaam u pood u ang hap wow phah dei thoh cha ka sorkar neibhah oo yme ye wow leh ya ki kaam pood.
Ka kyrwoh na u General Secretary ka seiñ u Lurman B Talang.
Puræ leh: Tympra wei thang ka KSU War Jaiñtia yeiwa kær ki nong Bangladesh ha Muktapur
