Ka Special Director General of Police ka jylla, ka Idashisha Nongrang da ong ko wa ka chnat pulit da yoh ko ya ka ujor na ka Nokma ka chnong Nengchigen, WKH wa haap ha Shallang Police Station, heiwa da pynbaad wa da em i tih mooyong tooh (Rat Hole Mining) ha i thaw ka kur.
Da ong wa ini i tih mooyong da ktah ko ya ka rymaw wei da pynsih leh ya ki um ki wah iwa man leh pyrchah ya ka hukum ka NGT waka Supreme Court. Wei kini ki bru wa emkti toh u Alnet Marak, u Clington Marak, u Pandit Momin, u Toban Marak, u Nazim Ali, u Lipson Momin wa u Panseng Sangma.
Katkam ka ujor ka Nokma, ka Kristina G Marak da pynbaad leh wa ki pulit da emkti ki ha ini i kaam deiwa chim poisa T. 500 kawi ka truck wei kamjooh da pynbaad leh wa da pynemkaam da kiwi ki bru wa kieñ suloi namo ki damok wa pyntieñ ya kiwa pyrchah ya ini i kaam.
Ynne ka sngi, ka Nongrang da ong ko wa ki pulit da yoh ki ya ka ujor wei dadep Register leh ya ka Case, wei katni ki pulit dang pynman ki ya ka takit.
Chooh chooh da ong ko leh wa ki pulit ym du wa takit ki ya ini i kaam wa da pynbaad tangwa da booddien ki leh ya kiwi ki kaam pyrchah aiñ wa mih na i tih wei khayi mooyong, weiwa em boon ki case kiwa da Register.
Heijooh i por da ong ko wa kamwa 90% ki Case wa da Register hajrong i kaam tih wei khayi mooyong tooh da leh bait da ki pulit.
