Ka Inter District U-19 Women’s Cricket Tournament 2022 wa pynman da ka Meghalaya Cricket Association da sdang ko ynne da ki yalehke wa pynman ha ki ar tylli ki thaw.
Ha Nongkhrah, Ri-Bhoi da pynman ya ka Zone 1 wa em ki 6 tylli ki liang kiwa da yabhah ha ka Group A kawa em ka East Khasi Hills, Ri-Bhoi wa West Khasi Hills katwa ha ka Group B da em ka East Jaintia Hills, Shillong wa South West Khasi Hills.
Ha Williamnagar, East Garo Hills da pynman ya ka Zone 2 kawa em soo tylli ki liang kiwa da booh hapoh kawi donhi ka kynhun wa kynthup ya ka Tura, North Garo Hills, East Garo Hills wa South Garo Hills.
Ynne ka EKH da jop ko ya ka Ri-Bhoi da 49 Run ha ka Zone 1 Group A. Ka EKH kawa da chah phah Bat nyngkong da yoh ko 149/3 heiwa ka Monica Lyngdoh da yoh ko 67 na 70 bol deiwa dat ko 11 tylli ki 4 Run. Ka Angelica Maring da yoh ko 1/28. Hawa kdong, ka Ri-Bhoi da dooh lut ko ya ki Wicket deiwa kamai thij 100 Run, heiwa ka Badabiang Lawai (4/23) waka Adelakmen Lawai (3/18) da pynhaap ki ya kiwa boon ki Wicket. Ka Marilinda Makri da kamai boon dooh ko deiwa yoh 20 Run.
Ha Williamnagar, ka EGH da jop ko ya ka NGH da 94 Run. Ka EGH hadien wa jop ya ka kylla khlem da jied ko wow Bat nyngkong wei da kamai ki 191/10. Ka Cheanchi Kambesa A Sangma da yoh ko 81 Run na 79 bol wa kynthup ya 9 tylli ki 4 Run wa kawi ka 6 Run. Arngut kiwa kawang bol wa yoh mar 3 Wicket kitæ ka Chigame Ch Marak (3/11) waka Chiangchi Ch Marak (3/38). Kiwa kawang bol won ka EGH da ye ki wow pynhaap lut ya ka NGH deiwa kamai du 97 Run. Ka Silkamchi N Marak (3/16) waka Ramgatchi N Marak (3/35) toh kiwa leh bha dooh ya ka EGH, katwa ka Jakrimchi Marak (20) toh du ka na ka NGH kawa ye wow yoh palat 10 Run.
Mynstep, ka East Jaiñtia daw yachem ko waka Shillong ha ka Group B ka Zone 1, katwa ka Tura daw yachem ko waka SGH ha Zone 2.
