U President ka National People’s Party (NPP) uwa man leh u Montri Rangbah ka jylla, u Conrad Kongal Sangma da ong u wa ha ki 4 snem wa dadep ka sorkar da chem ko chiboon i eh i khoo, heiwa da pynrap u leh wa ha ki 6 bnai wa sdang ka sorkar Meghalaya Democratic Alliance (MDA), da artatien ki paidbah wow neh ka sorkar wot tang chi snem, tangwa da ong u wa da i kyrkhu wa i chaniah wei khlem ap ya i chah pynbaad ka sorkar da lai ko chakhmat.
Da ong u wa ka sorkar da chem ko chiboon i eh i khoo, tangwa katwa dang boon i eh kattæ dang khlan wei ha kini ki 4 snem kani ka sorkar da chim ko ya ki rai wow leh ya ki kaam kiwa kiwi ki sorkar ym nood ki wow ktah, lada hei wow pynbait ya u pood wa kiwi ki kaam leh. Da ong u wa ka sorkar da pyrchang ko wei lada ym pyrchang daw pyndooh mynsien ko ya ki paidbah kiwa da e yei chaniah. U Conrad da ong u leh wa kani ka sorkar daw pyntikna ko wow pynman kaam ya waroh ki bynta wa chim ko.
Ka NPP da pdiang sñiawbha ko ynne ka sngi ya ki MLA/MDC warim wa yaka MDC wa katni na Umsning kiwa da psiah cha ka Party wow pynkhreh leh ya ka Election ha u snem 2023.
U Conrad da ong u leh wa kani ka sorkar toh kawa ap ya waroh, wei kam kiwa mihkhmat emkaam wow ap ki ya waroh wei emkaam leh wow hiar cha madan, da pynrap u leh wa ka sorkar da yaleh ko u krehlang leh wa kiwa em ha ka liang pyrchah neibynta i myntoi ki paidbah.
Da ong u wa ka sorkar MDA da pyrchang ko wow pynpoi ya ki kaam pynroi cha waroh ki kdong ki chmiang ka jylla, wei toh neini i daw wa wan psiah kiwa yahkhmat paidbah wow psiah cha ka Party, wei lada ki paidbah yoobiang ki wow e biang ya ki kaam synchaar cha ka party, ka NPP daw pynman ko ya ka thong wa da booh wow pynman ya ka jylla ha ka Top 10.
