U Montri ka chnat i chait i khiah, u James P K Sangma, ynne da wai u ya ka Phase II ka ICMR-STEMI ACT PROJECT, ha ka yalang wa pynman ha Pinewood Hotel, Shillong.
U James P K Sangma da e khublei u ya ka NEIGRIHMS wa da wanrah ko ya kani ka kaam cha Meghalaya deiwa ong wa daw man ko kawa yarap bha ya kitu ki yoh kjut klongsnam kam kiwa yoh Heart Attack khamtam kiwa wan na ki yung ki sem kiwa dooh wa duk neibhah ya i dawai (Clot Buster Medicine) daw e dei mynkna cha kiwa toh hok wow yoh.
Da ong u wa ini toh i sarong neibhah ka ICMR da jied ko ya ka NEIGRIHMS kam kawa pynkrehkaam ya kani ka Scheme ha Meghalaya, heiwa ka NEIGRIHMS kam ka thaw sumaar pyrdi daw pynkrehkaam ko ya kini ha ki 8 tylli ki Hospital ha Shillong wa kynthup ya ka Civil Hospital Shillong, Ganesh Das Government Maternity and Child Health Hospital, Reid Provincial Chest Hospital, Dr. H Gordon Robert Hospital, Nazareth Hospital, Woodland Hospital, Supercare Hospital wa ha Bethany Hospital.
U Dr. Nalin Mehta, Director ka NEIGRIHMS, da pyntip u wa i thong toh wow pynyoh smat yei sumaar hawa yoh Heart Attack ki bru iwa hapoh 90 minit deiwa e yei dawai Thrombolytics. Ini i dawai toh iwa chongdor hadooh T. 20,000 hadooh T. 25,000 tangwa hapoh kani ka Scheme daw e dei mynkna.
Kiwi de kiwa klam toh u Dr. Amit Malviya, Principal Investigator kani ka Project, ka M N Nampui, Commissioner and Secretary, Health and Family Welfare Department, ka R M Kurbah, Secretary Health and Family Welfare Department, u Dr. Aman War, DHS (MI) wa kiwi de.
