U Montri ka sorkar pyrdi, u Piyush Goyal da lai pdiang sñiawbha u ya kiwa nyngkong dooh ki nong India kiwa da yoh wow liwan na Ukriane lyngba ka Air India, AIC 1944 kawa da hiar ha Chhatrapati Shivaji Maharaj International Airport, Mumbai heipor 7:50 ynne i miet.
Kani ka lieñsuiñ toh kawa da mih na Henri Coanda International Airport, Bucharest, Romania ynne ka sngi deiwa kit ya 219 ngut kiwa boon toh kiwa lai puræ ha Ukriane kiwa da yoh wow mih na Ukriane yow psiah chapoh ka ri Romania.
Neiliang u Piyush Goyal da ong u wa sñiawkmen u wow yoo yei dur wa rkhai kiwa da yoh u poi dei suk sei saaiñ chapoh ka ri.
U Goyal da phah u leh ya kiwa yoh u liwan wow yaklam ki wa ki lok ki kiwa dang sahkut ha Ukraine wym toh u khuslai ki wei ka sorkar da yaleh ko katwa ye yow li thooh ki. Da pyntip u leh wa u PM Narendra Modi da yaklem u wa u President ka Ukriane yow pyntip chaphang ki nong India wa dang sahkut heiwa da pyntip u leh wa ka Russia da kular wow e u liwan suk ki nong India.
U Goyal da khana u leh wa da pynkreh ya kiwi ki lieñsuiñ heiwa ka wa ar daw hiar ko ha Delhi hei step ka sngi Bibar.
U Montri da e khublei u leh ya ka Air India wa da kreh ko neibynta i bha i miat ka ri heiwa da thapkti lang waroh kiwa da yoh u liwan.
Ya kini kiwa liwan da wan choo ya ki da kiwa boon kiwa hayung hasem yong ki na Aiport.
