Ka United Democratic Party (UDP) Youth Wing da pynthymme ko ya kiwa yahkhmat khynroo ka Party hapoh i yahkhmat yong u Kyrmen Shylla kam u President wa thymme wa kiwi won kiwa kitkaam ha ka Executive Committee.
Hawa klam wa ki laad pathai khubor, u Kyrmen Shylla da pyntip u wa kani ka kynhun wa thymme daw chong ko ya ka yalang wa nyngkong ha ka 7 tarik u Wisu (Mar) wow yaklam ya ki phang kammon wow pynkhlan ya ka Party neibynta ka Election MLA 2023.
Da ong u wa ka jylla katni ka emkaam ko wow yoh noh ya i synchaar da ki Party tre ri, heiwa da khut da wer u yei ya krehlang yong ki paidbah neibynta ka Election MLA kawa daw man ha u snem wow wan.
Hawa kylli hajrong i yakrehlang waka Hill State People’s Democratic Party hapoh ka Regional Democratic Alliance, da ong u wa i ya krehlang wa kiwi ki Party, ki khynroo ym ye ko wow chim rai, tangwa u e yumut ki cha ka Central Executive Committee yow lait wow em i yatyngkhooh hawa yatoh wa i booh ya ki kyrtong lane ha kiwi ki kaam.
Hawa kylli chooh chooh, da ong u wa toh du ka UDP kawa em boon kiwa yahkhmat wa dang khynroo kiwa man leh katni kam ki MLA, heiwa da ong u wa ka Party dang kreh chitom ko wow sai chooh chooh ya ki khynroo ki wow mihkhmat hapoh ka yung dorbar chna aiñ ka jylla.
Hawa yatoh wa i mih wow lai psiah yong kiwi kiwa yahkhmat cha ki wym toh ki Party kiwa napoh ka jylla, u Kyrmen da ong u wa kiwa yahkhmat toh u yaichah ki wa ki seiñ saiñpyrthai ki tre chnong, wei i lai pynyabi yong kiwa yahkhmat cha kiwi ki Party toh i tlot yong kitu ki bru kiwa lai wow psiah cha kiwi ki Party. Da ong u wa kiwa khut em ki boon ngut, tangwa lada kiwa yahkhmat tlot ki wei bakla ki wow chim ya ka rai, ini toh i bakla samen yong ki.
U Kyrmen da ong chooh chooh u wa neiliang ki khynroo daw pyrchang ki wow yaklam biang wa kiwa boon kiwa yahkhmat yow uiñ biang cha ka Party khnang wow yoh yei jop wa boon na ka Party yow ye u yada yei man tre.
