Hadien wa pteiñ i yakhih pyrchah da ki kattu katni wa ki seiñbhalang ha ri-loom Garo, ynni i miet, u CEM ka Garo Hills Autonomous District Council (GHADC), u Rakesh A Sangma da phah noh u ya ka chithi hiar chuki cha u Lat ka jylla hadien wa da mih chwa ka khubor wa daw hiar chuki noh u.
Hawa kylli hajrong ka saiñhima sima ha GHADC, u Montri Rangbah ka jylla, u Conrad Kongal Sangma da kyntait u wow ong iwon iwon, tangwa da pynsñiaw u wa i hiar chuki u Rakesh Sangma toh wa da chim da ki MDC, wei i rai hi wa da chim lang toh neibynta i bha ki paidbah wa ka Council waroh kawi.
U Conrad uwa man leh u President rangbah ka NPP, da ong u wa neiliang ki MDC da wanrah ki ya i pyrtuid u Albinush R Marak wow yakhun neibynta ka chuki CEM, hadien wa ieh noh u kam u Deputy Chairman ka Council.
