Ynne ka sngi da pynman ya ka Semi Final kawa ar yong ka lympung Open To All T20 Cricket Tournament 2022 wa da pynlai da ka All Jaiñtia Cricket Association ha Madan Jrisalein, Jowai.
Chwa wow sdang ka yalehke da em i ngoohblai samen kamwa chi minit kam ka dak wa ka AJCA emlang ko chirup wa ka yung ka sem u Shane Warne uwi na ki khloor yalehke Cricket wa pawnaam ka ri Australia, uwa da khlaad ynnin ka sngi.
Ha ka yalehke ynne, ka Moodymmai da jop ko ya ka Amity (L) Nissan Laloo United da 5 Wicket.
Ya ka kylla khlem da jop da ka Moodymmai heiwa da jied ko u kawang bol nyngkong heiwa da ye ko u pynhaap 6 Wicket na ki 20 Over. U N. Teimiki Passah wa u Bishar Lamare da yoh ki mar 2 Wicket naki 4 Over, neiliang ka Amity kawa tied nyngkong da ye ko u kamai 146 Run na ki 20 Over heiwa u Chamitreman Lamare da yoh u 44 Run khlem haap.
Hawa kdong won ya ka thong, ka Moodymmai da jop ko deiwa kamai 151 Run na ki 14.2 Over deiwa dooh 5 Wicket, heiwa u Bishar Lamare da yoh u 24 Run naki 13 bol katwa u S. Pakyntein da ye u yoh 4 Wicket naki 4 Over.
Ya i naam Man of the Match da yoh da u Bichar Lamare uwa da yoh u 24 Run wa 2 Wicket.
Ya ka yakhun Final u man ko haka 08-03-2022 heipor 11:00 waje i step hapyrdi ka HUCC waka Moodymmai.
