U Ravi Teja (Guest Professional) ka Meghalaya da leh bha u deiwa yoh ya ka spah Run ha ka sngi wa le ka Ranji Trophy ha ka Elite Group A pyrchah ya ka Gujarat ha Rajkot ynne ka sngi.
Hadooh wa kut ka yalehke, u Teja da yoh u 133 Not Out, deilang wa u Punit Bisht (Guest Professional) uwa da yoh 55 Not Out yow pynyoh ya ka Meghalaya 234/3, deiwa emkaam sa 165 Run yow phah Bat biang ya ka Gujarat sa chisien.
Ka Meghalaya da sdang chwa ko ynne da 99/6, heiwa u Bisht da yahkhmat u da 54 Not Out. Tangwa da haap u ha ka 6.2 Over deiwa kamwa 59 Run tangwa kiwa Bat cha tdong ka Meghalaya da ye ki wow kamai Run yow pyndik ya kiwa kawang bol ka Gujarat.
U Aryan Bora da yoh u 12, u Akash Kumar Chaudhary 22 wa u Chengkam Sangma 11 Not Out yow pynyoh ya ka Meghalaya 166 All Out.
Wei ini da man i iwa dang duna da 389 Run ya iwa da kamai ka Gujarat ha ka Innings wa nyngkong iwa 555/8, kamtæ ka Meghalaya da phah Bat biang ya ka.
Kiwa wai yei kamai ka Meghalaya, u Purajit Mondal wa u Ravi Teja da neh ki 9 Over chwa wow baam ja sngi. U Mondal da phah ya oo wow neh u heiwa da neh u 23.4 Over chwa wow haap u deiwa kamai 10 Run.
U Teja da ye u wow dat 18 tylli ki 4 Run wa 3 tylli ki 6 Run. U Bisht leh da yoh u 6 tylli ki 4 Run wa kawi ka 6 Run.
I kyrmen ka Meghalaya kattu toh wow neh hadooh wa kut ka sngi khaddooh mynstep wei ini leh da man ko i sien wa nyngkong ha kani ka samoi wa ka Meghalaya da poi ka yalehke hadooh ka sngi wa soo ka Ranji Trophy.
