U Montri Rangbah ka jylla, u Conrad K. Sangma ynne ka sngi chirup wa ki Montri ka jylla da pynlait u ya ka kot “Meghalaya on the Move” kawa man ka bui krehkaam ka sorkar MDA ha ki soo snem wa dadep ha ka yalang wa da pynman ha Soso Tham Auditorium, Shillong.
Neiliang u Conrad da ong u wa ha ki soo snem wa dadep ka sorkar da elaad ko ya ki chnat krehkaam wow krehkaam laitlooid ki wei wow chim ki ya ki rai katkam wa emkaam ki neibynta i bha i miat ka jylla wa ki paidbah yong ka.
Da ong u wa kam kiwa yakhmat ka jylla emkaam wow tipmit ya ki bru wei iyi emkaam ki.
Chooh chooh u Conrad da ong u wa da chem yei eh i khoo ha ki soo snem wa da lai wei lyngba i kreh lang chirup ka sorkar da ye ko wow wanrah ya ki kaam pynroi wow myntoi ki paidbah.
Da pynkynmoo u leh yei tlot u pynkrehkaam ya ka PMGSY ha ki snem wa dadep, deiwa pynrap leh wa i wanrah ya ki kaam pynroi ki sarok man ki kiwa emkaam bha wei ha ki soo snem ka sorkar da pyntikna ko wow chna ya ki sarok wei katni da man ko kawi na ki jylla wa da kreh bha ya ki sarok ha ka ri.
U Conrad da kdaw u leh wa du ha u 2018-2022 da em 1,851 Km ki sarok ha ki thaaiñ palatsor wa da chna ha i lut wa T. 1,300 klur wei ka Meghalaya da chna ko hadooh 2 Km u sarok man-ka-sngi ha u snem 2020-21.
Heiyatoh wa i pynlut ka sorkar ha ki kaam pynroi, neiliang u Conrad da ong u wa T. 10,000 klur da pynlut ka sorkar chi snem wei daw pynlut won ko T. 15,500 klur ha uni u snem deiwa ong leh wa kamwa joor i pynlut kamtæ daw ye u pynku ya i yoh i laa ka jylla.
Neiliang u Conrad da ong u wa ka sorkar da yaleh ko wow e kreh ya ki paidbah ka thaaiñ palatsor chiboon chah bar yeiwa nachwa kamjooh leh da e yarap ko wow pynkupor ya ki kynthai katni; wei da pyntikna ya ka bordiñ kamjooh leh ka um kawa khlem thut cha waroh ki manyung.
Ha kani ka sngi da khana u ya ki kaam pynroi wa yatoh wa ki warep, i chait i khiah, i puræ puthi wa kiwi kiwi.
Da ong u leh wa ka sorkar jylla daw yaleh ko wow pynman ya ka Meghalaya kam ka Top 10 State ha ki 10 snem, heiyatoh wa ka GSDP Per Capita wa SDG Ranking.
