I eh heiyatoh wow yoh thaw noh jhep ya ka chnong Jowai da yaklam biang hajrong ini ynne ka sngi hapoh ka yung dorbar heiwa da wanrah ya kani ka phang da u MLA ka Mowkaiaw, u Nujorki Sungoh uwa da kylli wa lada yoh thaw noh jhep namo ym pu em wei lada da yoh thaw, iyi wa da leh.
Hawa pynche yeini, neiliang u Montri ka chnat Urban Affairs, u Sniawbhalang Dhar da ong u wa i thaw wa katni wa em ha Moochutsdai toh iwa da pynemkaam chipor donhi wei ha ka 4 tarik uni u bnai da dep wow pynman ya ka Public Hearing yow pynman noh kam ka thaw noh jhep wa pura wei dang yang ya ka bui (Report) na u DC ka West Jaiñtia Hills yow ye u chim ya ka rai.
Neiliang u Nujorki da ong u wa u Montri dadep u wow ong wa ym leh yabor yei mon ki paidbah heiyatoh waka thaw noh jhep kamtæ kammon u leh hawa kiwa chong chnong wa em chajan kani ka thaw noh jhep da dep ki wow pynyoo yei pyrchah tangwa da dep wow li noh la 800 sien i jhep da ki truck ka Jowai Municipal Board.
Da ong u leh wa da em kiwa pynyoo cha oo ya ki dur wa ha Salaroh, Jowai da em i thaw wa da lang jhep wa da noh ki bru neidaw wym yoh thaw ki.
Hajrong ini da klam leh sa u MLA ka Mawsynram, u HM Shangpliang uwa da ong wa i jhep wa da kular wow kit nadooh ynnin wa em ha Iawmusiang hadooh ynne i step dang neh i kamjooh hi, heiwa u Montri da kular u wow kit noh ki waroh pyn myntu i janmiet iwa da wanrah yei rkhai na kiwa boon heiwa u Shangpliang da ong u wa daw kylli biang u yeini mynstep yow pait lada yoh biang yei jooh i jubab na u Montri.
Ka MLA ka East Shillong, ka Ampareen Lyngdoh leh da chimbynta ko ha ini i yaklam deiwa kylli wa ileh ka sorkar ym chimkhia ko wow pynyoh yei thaw noh jhep heiwa u Sniawbhalang da ong u wa ka sorkar dang thooh thaw ko kattæ ya i thaw noh jhep wa chi por.
U Montri leh da pyntip u wa neini chakhmat i rukom noh jhep u pynkylla noh ki deiwa pynman yei jhep kam i sboh wei wow pynemkaam da i stat ka juk wa katni namo ka Scientific Sanitary Landfill.
U MLA ka Rangsakona, u Zenith Sangma leh da kdaw u wa ha Tura leh ha u snem 2018, u Montri Rangbah da kular u wow thooh thaw noh jhep chawi neibhah i thaw noh jhep wa katni toh iwa em chajan thaw sah ki bru tangwa hadooh katni ym em leh iyi iyi.
Neiliang won u MLA ka Nongpoh, u Mayralborn Syiem da ong u wa ka Solid Waste Management wa em ha Nongpoh da dep wai ya ka tangwa hadooh katni ym em pynkrehkaam ya ka, kamtæ da kyntu ya ka sorkar wow sdang noh ka.
