U MLA ka Mawlai, u Process T. Sawkmie da wanrah u ynne hapoh ka yung dorbar yow yaklam hajrong i roi i dih drugs wei chalan drugs khamtam hadien wa mih khubor wa yoh kem ya i drug Cocaine na ki nong Nigeria heiwa ini i drug toh iwa mut wow pynpoi cha Shillong.
U Sawkmie da ong u wa katni i dih drugs da sdang ko nadooh kiwa dang em 15 snem i rta wei ym toh du kiwa wan na ki manyung wa mahajon wa da dih wot kiwa dooh wa duk leh wei katkam wa mih khubor da yoo lakam wa ki drugs da poi ki nadooh na baar ri.
Heijooh i por da ong u wa sñiawkmen wow yoo wa na i por cha i por da yoh wow kem ya ki drugs wa chongdor da ki klur tangwa ini ym pu toh iwa biang neibhah dang boon ki drugs wa yoh u psiah chapoh ka jylla.
Neiliang u Montri wa pait ya ki kaam pohyung ka jylla, u Lahkmen Rymbui da pyntip u wa heiyatoh wa i chah kem ki nong Nigeria, kini toh kiwa da chah kem da ki pulit ka Assam na Guwahati Railway Station kiwa wan na Delhi heiwa da em ki arngut.
Na kini ki arngut da yoh wow kem 16.40 gm i Cocaine wei heiyatoh wa ini da rah ya 4 ngut kiwa napoh Meghalaya yow takit wei na kini da kem noh ya uwi da ki pulit ka Assam wei ka takit dang lai ko chakhmat.
U Montri da pyntip u leh wa ki kaam wa da kem da ki pulit heiyatoh wa i drugs da em ki 56 tylli ha u snem 2017, 81 tylli ha u snem 2018, 117 tylli ha u snem 2019, 69 tylli ha u snem 2020 wa 69 tylli ha u snem 2021.
Da em leh 218 tylli kiwa da dep wow lai chakhmat wow leh Charge Sheet katwa 144 tylli toh kiwa dang em hei takit.
Da pyntip u leh wa ha ki 5 snem wa dadep da yoh kem 12,658 gm i Heroin hapoh ka jylla. 18,668 tylli ki dawai kuli Tramadol Hydrochloride, da kem leh 85,866 tylli ki dawai YABA wa 4439 tylli ki klong Phensedyl.
Chooh chooh da pyntip u wa da pynkrehkaam leh ya ka Anti-Narcotics Task Force (ANTF) ha ki 11 tylli ki District ka jylla.
