Ynne ka sngi da sdang ya ka 1st Football Knockout Tournament 2022 wa da pynman da ka JSU Shangpung Unit, kam i dak wa dap 50 snem yong ka seiñ wei yow kyntu ya ki jait yalehke hapoh ri-loom Jaiñtia .
Ya ka yalang wai da pynlai da u Bantei Sungoh uwa man kam u Environment Secretary heiwa u kongsan ha kani ka sngi toh u Dapmain Suchiang uwa man u President ka JSU Laskein Block Circle, u symbood kongsan u Franky Shylla, General Secretary ka Laskein Block Circle deiwa emlang u Chibaitmi Langstang uwa man kam uwa yalehke Martial Arts uwa man leh kam u Secretary wa u Coach ka West Jaiñtia Hills District Taekwondo Association deilang wa ki dkhot ka Shangpung Unit.
Ha ka yalehke wa sdang da pynman hapyrdi ka Kyllain B waka SL FC heiwa hadooh wa kut i por da yoh u thap mar chi kool wa thap nyngkong da ka SL FC lyngba u Kenny Langbang katwa ya ka Kyllain da thap da u Salonbhami Suchiang.
Kiwa rah ya kani ka Tournament u yoh ki T. 50,000 katwa kiwa rem u yoh ki T. 30,000.
