Ynne ka sngi ha ka yung dorbar chna aiñ ka jylla, u Montri ka chnat puræ puthi, u Lahkmen Rymbui da pyntip u wa ka sorkar jylla ym em ko i thmu wow chna ya ki Medical College ha Jaiñtia Hills, Ri-Bhoi wa ha West Khasi Hills wei ya ini da jubab u yeiwa kylli u MLA na Mawlai, u PT Sawkmie.
U Montri da pyntip u wa katkam wa man katni i kreh ha ka Medical College ha Tura dang lai i chaphrang tangwa i kreh ya ka Medical College ha Shillong dang man iwa sahteiñ na kiwa boon ki daw.
Neiliang u MLA na Nongpoh, u Mayralborn Syiem da kyntu u ya ka sorkar wow pyrkhat noh wow chna ya kawi ka Medical College ha Ri-Bhoi District neibhah wa da man ko kam kawi na ki District kawa da paaw bha.
U MLA ka Mawsynram, u HM Shangpliang hawa chimbynta ha kani ka phang da ong u wa em chiboon ki khynnah napoh jylla kiwa kwah u lai puræ Medicine (MBBS) wei hap ki wow thooh Admission ha kylleiñ ka ri, katwa kamtæ da kyntu u ya ka sorkar wow booh noh da ka Policy wow chna rap boon ki Medical College wow rap suk kiwa kwah u lai puræ.
