Heiyatoh wa i rukom su ya ka bai bordiñ ki bru lyngba ka Online Payment, neiliang u MLA ka North Shillong, u Adelbert Nongrum da kylli u yeiwa hap ki bru u su heiwa u Montri wa pait ya ka chnat bordiñ, u Prestone Tynsong da ong u wa ki paidbah najrong ka bai bordiñ wa da dep kheiñ da hap ki wow su ya ka bai nong (Commission) yong ki Bank wa pynemkaam ki bru katwa ka sorkar da ku ko ya ka bai Payment Gateway kawa da pynemkaam sorkar yow ye u su Online.
Hajrong ini u Adelbert da kylli u wa hawa su ya ka Bill Online da hap su tam ki paidbah kamwa T. 6 wei kani ka poisa toh kawa lai cheiwon, neiliang u Prestone da pyntip wa kani ka poisa toh ka poisa (Commission) kawa da chim da ka Bank katwa ka T. 2.50 kawi ka Bill wa chim da ka Payment Gateway toh kawa da su da ka sorkar hi ym toh kawa kheiñ na ki bru wei kani ka T. 2.50 ym em kheiñlang ka hapoh ka bai bordiñ ki bru.
Neiliang won u MLA ka Nongthymmai, u Charles Pyngrope da ong u wa lada su ha kiwon kiwon ki Website ym jooh em kam kattæ ka hap su pyntam neiwa da em ha ka Bill heiwa hadooh ka RBI leh da khang ko yeini.
U Prestone da pynche chooh chooh u wa ka sorkar da dep booh ko ya kiwa pait (Vendor) ha ka Website yong ka yow ye ki bru wow su Online wei kini da chim nong ko T. 2.50 kut sien wa su bai bordiñ Online wei kani ym em hap wow su da ki paidbah tangwa kawa su da ka MeECL. Wei ya ka T. 6 wa hap su tam toh ka Banking Commission wa kheiñ da ki Bank kawa da ah na ka Account ki bru wa su bai bordiñ wei ka MeECL ym emkti ko heini.
Hajrong ini, u Charles Pyngrope da ong u iyi i daw wa hap wow su tam T. 6 neibhah lada su Online heiwon heiwon ym jooh hap wow su tam ya iwa da kheiñ, neiliang u Montri da ong u wa daw pait ka sorkar yeini.
