Ka Education Cell ka KSU WJHDU hadien wa yoh ko ya i ujor na ki paidbah da lai pait ko ya ka Government Boys Higher Secondary School Jowai ynne ka sngi heiwa da chem ya iwa boon i duna.
Ka seiñ da chem ko wa ki jooh kiwa sikai ha ka Day Shift (Arts) hap hikai ki leh ya ki khynnah ka Morning Shift heiwa da em ki khynnah hadooh 85 ngut katwa kiwa sikai won em ki du 6 ngut weiwa ini da man iwa sñiawsih khamtam wa ki jooh kiwa sikai hap chakri ki ha waroh ar tylli ki Shift.
Heiyatoh wa ka Science Laboratory da kyntu wow chna smat noh ya ka khnang wow yoh ki khynnah ya i hikai wa biang, wei da chem ka seiñ wa kani ka skur ym em ko ya ka Library wot hadien wa em ko ya ka Higher Secondary School.
Da chem leh wa i kynroh iwa da oor nadooh u snem 2020, hadooh katni da ieh khlem chna iwa da booh hei maa ya ki yung hadien kani ka skur.
Chooh chooh da chem ko wa hadooh katni ym em u sliah ya i yungskur iwa da piah wei ye u oor ha iwon iwon i por wot hadien wa wan pait u Montri ka chnat puræ puthi ka jylla wei da kular leh wow sliah noh ya ka.
Hajrong ini waroh ka seiñ da dawa ko na ka sorkar wow chimkhia hajrong ini i duna wa ka skur chem ko neibynta i bha i miat ki khynnah, kiwa sikai, ki wakreh kamjooh leh ki paidbah wa sah hajan kani ka skur.
