Hadien wa rai ka Jaiñtia Hills Autonomous District Council (JHADC) wow pynman noh ya i jied Dolloi ha Elaka Shangpung hadien kamwa 8 snem. Neiliang u MDC ka MDC ka Muthlong Sohkympor, u Lomris Lyngdoh da dap u dei sñiawkmen wei da e khublei u yaka Executive Committee kawa katni hapoh i yahkhmat u CEM ka Council, u Thombor Shiwat wa u Fineliness Bareh uwa man u MDC wa pait ya ka chnat Political wa da pynman sakhiat ki ya ini i kaam hadien da ki boon snem.
Da pyntip u wa neipor cheipor nadooh wa man u kam u MDC da booddien teiñ u ya ini i kaam.
Chooh chooh da ong u wa hanla man u kam u MDC ka thaaiñ ym em u kyrchaan u kat ya kiwa em ki kyrtong Dolloi neibhah du wa bien u pynman ya ka da hun i mynsien u.
Da e khublei u leh ya u MDC ka Shangpung, u Treilang Suchiang wa da yaleh ki katwa ye wow pynman ya kani ka Election deiwa pynrap leh wa oo ym lai kyrchaan u yeiyi yeiyi leh neibhah i bor hi chong i ha ki paidbah.
