U MDC ka Mawlai Constituency, u Teiborlang Pathaw uwa man leh u dkhot ka United Democratic Party (UDP), ynne ka sngi ka 21 tarik da phah u ya ka chithi cha u President ka UDP wow pyntip wa da mih noh u naka Party.
U Teibor da jop u ya ka Election MDC ha u snem 2019 kam u kyrtong khlem seiñ, tangwa mar jop u da lai psiah u cha ka UDP, heiwa dayoh u leh wow ksoh ya ka chuki Executive Member ha ka Executive Committee wa yahkhmat da ka UDP ha KHADC.
U MDC ka Mawlai da pynsñiaw u wa i mih noh u na ka UDP toh neidaw wa lai lait kiwa yahkhmat ka UDP Mawlai Circle hawa yatoh wa i chim rai yong ka Party hanla wa da em i pynbait wow pynkhlan ya ka Party.
Da ong u wa ka Party ha i por wa da chna ya ka Mawlai Circle da leh khlem da pyntip iyi iyi ya oo, wei iwi won i daw toh wa leh mylliñ kiwa yahkhmat ka Party hadooh wa ki kattu katni da chim rai hi ki wow pynbna ya u kyrtong ka Party neibynta ka Election MLA kawa daw man ha u 2023.
Da ong wa i pynbna ya u MLA wa da chah beh (Suspended) na ka Congress, u PT Sawkmie wo man kam u kyrtong ka UDP ym toh deiwa pyntip da kiwa yahkhmat ka seiñbei, tangwa da sñiawthooh wa da leh da ki kattu katni kiwa yahkhmat ka UDP hapoh ka Circle, iwa da pynman ya oo wow pyrkhat noh da iwi i luti.
Hawa kylli, u Teibor da kyntait u wow pyntip chooh chooh cha kayi ka seiñ wa thmu u wow pynyabi, tangwa da ong wa daw khut ya kiwa yahkhmat wa kiwa kyrchaan mynstep ka sngi yow pynbait ya ki luti wow lai chakhmat.
Hanla u Teibor da kyntait wow khana iyi iyi hajrong cheiwon u lai kamjooh kiwa kyrchaan ya oo, tangwa katkam ka khubor kawa da hær chaneiñ cha wah da ong wa daw lai psiah noh u cha ka National People’s Party (NPP) ha iwon iwon i por.
