I jied ya ki Dolloi yong ki ar tylli ki Elaka kiwa kynthup ya ka Elaka Nartiang wa Elaka Shangpung daw pynman ha ka 23 tarik uni u bnai.
Heiyatoh wa ka Elaka Shangpung da em le ngut ki kyrtong wei daw em 10,607 ngut ki wow jied ya u Dolloi katwa ha Elaka Nartiang da em soo ngut ki kyrtong wei ki wow jied won da em ki 7,196 ngut.
Hawa yaklam wa u Superintendent of Police ka West Jaiñtia Hills, u Bikram D Marak ynne ka sngi heiyatoh wa i pynkhreh, da pyntip u wa neiliang ki pulit daw pyntikna ki wa i jied Dolloi u man i iwa lai bait lai ryntih.
Da ong u wa da booh ar ngut ki pulit ha kawi pa kawi ka Polling Station wei da thung leh ya ki Zonal Officer ha man ki 4-5 tylli ki Polling Station, katwa ha ki kattu katni tylli ki Polling Station kiwa haap hapoh ka East Jaiñtia Hills daw pait da ki pulit ka East Jaiñtia hi.
U SP da pyntip u leh wa ki pulit da pynkhreh ki heiyatoh wa i sonteri ya ka Strong Room ha MDC Hostel, Jowai.
Da kyrmen skem u leh wa i jied u man i iwa lai bait wei neiliang yong ka chnat pulit leh da man ko kawa da pynkhreh heiyatoh wa ini i kaam.
