Ka seiñ Jaiñtia Youth Federation-Jowai Circle, ynne ka sngi da lai ujor ko ha u Deputy Commissioner ka West Jaiñtia Hills, u Garod LSN Dykes heiyatoh wa i jhep wa da lang ha kylleiñ ka chnong Jowai.
Ka seiñ da ong ko wa na i jhep da mih joor i sma i tung, da mih leh ki phare wa ki mait kiwa ye wow wanrah ya ki kjut wa boonjait kiwa hær cha ki marbaam mardih kiwa em ha yaaw ha haat.
Ka JFY-Jowai Circle da kyrpaad ko ya ka yung krehkaam u DC wow chimkhia noh ya ini deiwa siat dawai wow yada na ki kjut.
Neiliang u DC da ong u wa da phah kot u cha ka Jowai Municipal Board wow kyrriah noh ya i jhep na ki bynta ki yaaw wa kynthup ka Yaaw Tympang, Yaaw Chor, Yaaw Seiñraij wei wow phah siat dawai ki ya ki jhep man-ka-sngi wow lait u wanrah i ki kjut cha ka chnong ka thaw.
Ka seiñ da maham ko leh wa lada ym chimkhia yeini, daw lai ko chaphrang da kawi tawon ka luti.
