April 1, 2022
Ka Seiñ Raij Mukhla ynne ka sngi Muchai 1 tarik Naitung da pyndep ko yei kñia e ngooh ya ka Blai Syiem Khlam wa u Blai Ram Shyllong kiwa man ki Blai wa kær wa da wa ri wa sumaar ya ki khon ki raiot ka Seiñ Raij Mukhla.
Ya kani ka leh niam kawa da jooh leh man-u-snem ha u Naitung (Apr) hachwa wa ki khon ki raiot ka Seiñ Raij Mukhla u hiar rep ki ya ki symbe jhoor, symbe toh, ki saru ki salah wa kiwi tawon ki jait jhoor wa boon jait hapoh ka Seiñ Raij Mukhla heiwa kat wym pu ye u pyndep ya kani ka kñia ya ka Syiem Khlam wa u Ram Shyllong, ki khon ka Seiñ Raij Mukhla ym hoi u thung jhoor thung saru thung salah ki.
Advertisement
Advertisement
Advertisement
Kani ka leh niam toh ka leh niam kawa nyngkong dooh yong uni u snem wei em leh kiwi tawon ki rukom leh niam wa dang boon kiwa daw pyndep ya ki hapoh uni u snem katkam ki por wa ki samoi. Ha kani ka leh niam kñia, ki khon khynroo ka Seiñ Raij Mukhla da ya pynkhreh ki u tah ya u Kymphu da u chken hei dur yong u syntu iwa mut wow beh wow sympat ya ka kjut ka chitom cha jngai na ka Seiñ Raij Mukhla.
Ya kani ka kñia da sdang ya ka nadooh i por step 7:00 waje ha Yung Blai Yung ka Bei Langdoh. Hadien wa wada pyndep ya ki kaam hapoh yung ka Bei Langdoh, u Pa Langdoh chirup wa u Maji, u Chutia deilang wa ki Waheh Sankur da mih lai kñia ki cha duwan kñia ha Khloo Blai kawa da pyndep da u Maji Niam ka Seiñ Raij Mukhla uwa na ka Kur Sari deiwa pynemkaam da uwi u Syiar Ryngkooh wa ka Sñiang.
Kamtæ ha uni u snem miat ka kñia ka khriam, tæ da yooluti wa ki khon ki raiot ka Seiñ Raij Mukhla u yoh ki dei chait dei khiah yow man i khih i khan yong ki lada hei puræ puthi yong ki leh.
I yumut yong kani ka leh niam kñia ya ka Syiem Khlam wa u Blai Ram Shyllong toh wow e ngooh yow beh ya ka khlam ka ngoh, ka kjut ka chitom cha wa soo wa sep ka sngi u bnai khnang yow yoh ki khon ka Seiñ Raij Mukhla dei chait dei khiah.
Ini toh katkam wa da pynlait khubor u Waheh Sari u Standbyme Sari.
Advertisement
