Ka Myntdu Lions da jop ko hei sien wa ar ha ka Senior Men Challengers Cup ka Meghalaya Cricket Association da 8 Wicket ya ka Symper Panthers ynne ka sngi ha Shillong.
Ka yalehke da ye wow sdang heipor 2:00 waje i sngi heithaw 9:00 waje i step neidaw u slap deiwa yaleh mar 16 Over chi liang heiwa ka Myntdu da jop ko ya ka kylla khlem wei u Captain Dippu Ch Sangma da jied u wow kawang bol chwa wei da ye u ki wow pynhaap lut ya kiwa Bat ka Panthers da 99 na ki 15.1 Over.
Ka Myntdu Lions da kdong ko deiwa suk wei da jop ko ha ka 12.4 Over deiwa dooh 2 Wicket wei ini da man ko leh ka sien wa ar wa rem ka Symper ha ki ar sngi.
U Captain ka Symper, u Kishan Lyngdoh da sdang u deiwa khlan hadooh wa kawang bol u Aryan Bora (1/16) wei da haap u leh ha oo deiwa kamai 24 Run. Ya ka Panther da kamai boon dooh da u Babloo Passah uwa da dat 6 tylli ki 4 Run yow yoh 34 Run.
U Dippu da lehbha u na kiwa kawang bol ka Symper deiwa yoh 4/16 heiwa da yoh u leh 3 Wicket ha kawi ka Over. U Chengkam Sangma (2/18) wa u Riboklang Hynniewta (1/22) toh kiwa kiwa yoh u pynhaap Wicket.
Na kiwa Bat ka Myntdu da lehbha u Rohit Shah da 51 na 32 bol wei da haap leh kiwi ki arngut ha u Kishan (2/22). U Rohit Rai da yoh u 19 katwa u Hynniewta da yoh u 21 deiwa neh hadooh wa kut deiwa yoh lok wa u Shah.
Neibynta ka 51 Run wa le tylli ki yoh kem bol kam u Wicketkeeper, u Shah da yoh u yei naam Player-of-the-match.
Mynstep ka Umiam Eagles daw yachem ko waka Nokrek Tigers heipor 9:00 waje i step.
