U Montri Rangbah ka jylla, u Conrad K Sangma da ong u wa i yaklam ka sorkar waka Hynñiewtrep National Liberation Council (HNLC) daw man bait i lyngba ki ksiang, neibhah wa ya ini i kaam da ekti wow pynlai chakhmat da ki ksiang yong ki arliang mamla.
Ka sorkar jylla ynne ka sngi da pynlang ko ya ki sahep wow yaklam neibynta i long i man ka jylla heiyatoh wa i suk i saaiñ, wei ha kani ka yalang da yaklam bha leh hajrong i pynlai chaphrang ya i klam yasuk waka HNLC.
Ha kani ka yalang wa da khut da u Montri Rangbah, u Conrad K Sangma da emlang leh u Symbood Montri Rangbah, u Prestone Tynsong wa u Montri ki Kaam Pohyung, u Lahkmen Rymbui, ki sahep wa kynthup ya ka Chief Secretary, ka RV Suchiang, ka Special DGP, ka I. Nongrang wa u ksiang yong ka sorkar wow yaklam waka Hynniewtrep National Liberation Council (HNLC), u Peter S Dkhar.
Hawa kylli, u Montri Rangbah da kyntait u wow khana iwon iwon heiyatoh wa ka yalang neibhah wa ini i kaam dang sdang i wow lai chaphrang wei ka sorkar ym kwah ko wow em iwon iwon i chah ktah, tangwa da ong u wa iwon iwon iwa ki paidbah emkaam ki wow tip toh wa ka sorkar da chimkhia ko ya ini i kaam.
