Yow pynyoh salonsar ya i rukom pyndep niam thang hapyrdi kiwa yap mynsoo wa kiwa yap nei kjut wa na i heh rta, ynne ka sngi ka Seiñ Raij Raliang da ye ko u wai paidbah sa kawi ka Khnap Thang-bru wa kyrpang ya kiwa yap mynsoo wa nyngkong dooh hei sakhi lang ki khon ka Seiñ Raij, ki waheh wasian wa kiwa chah khut sñiawbha.
U Hamjhan Dkhar, kam u Secretary ka Seiñ Raij Raliang da pyntip u wa ya kani ka khnap thang ya kiwa yap mynsoo da chna hei lut kamwa T. 6 lak tam wei da pynlut chwa leh da u Marlangki Suchiang uwa man u khon ka Seiñ Raij.
Yaka khnap thang-bru neibynta kiwa yap dei kjut i sa wa kiwi, ka Seiñ Raij da yoh ko nadooh u snem 2012, katwa ya kiwa yap mynsoo won waroh chi kattu da hap u thang ha loom hapdeiñ kat wym chah ka ñia u thang lang chirup.
Kamtæ deiwa yoh artylli ki khnap, kiwa khlaad da ye ki u yoh kajooh ka rukom wow pyndep ya ka niam thang.
U Rikut Pareiñ hawa e yei klam ong u wa hei im u bru em le tylli ka niam wa kyrpang waki Niamtre hap ki u pyndep iwa kynthup yaka niam kha, ka niam bia waka niam yap, wei waroh kini man iwa emkaam waki khon ka Niamtre ymtoh u leh lyndet ki.
Neiliang u kongsan yong kani ka sngi u Hambines Passah, Vice President Seiñ Raij Jowai e yaroh u yaka Seiñ Raij Raliang wa da ye ko u chna ya kani ka khnap, wei pynkynmoo haroh u yei pyrtuid i naam u (T) Kambel Shullai uwa chem ya ka khnap thang-bru deiwa ong wa uni u bru wymtoh uwa boonktien tangwa ki kaam yong oo man ki kiwa khroo.
Da ong u leh wa ka khnap thang-bru wa chna nyngkong dooh toh ha Jowai ha u snem 2002, heipor wa sdang waroh ki waheh ka Seiñ Raij pyrchah ki ka tangwa ki khynroo won lai ki chakhmat, wei katni da yoo wa man ko kawa yarap bha nadooh i duna lut wei pynsmat yei por wow pyndep ya ka niam.
Kiwi won wa e yei klam kynthup u Dr. Tyngkan, u waheh chnong ka Raliang wa kiwi wei ya ka yalang da pynlai da u President ka Seiñ Raij Raliang u Binroy Dkhar.
Da pynchongchit chooh chooh ya kani ka sngi da i chaad i rwai na ki khon ka Seiñ Raij.
