theme-sticky-logo-alt
theme-logo-alt

Senior Men Challengers Cup: Jop ka Umiam Eagles ya ka Myntdu Lions

Ka Myntdu Lions da yoh ko wow booh kawi ka kjat ha Final ka Senior Men Challengers Cup ka Meghalaya Cricket Association tangwa da chah taan won ko ha ka Umiam Eagles kawa da ye u jop da 19 Run ynne ka sngi.

Da phah bat nyngkong ya ka Eagles kawa da ye u kamai 114 Run tangwa ka Lions won da ye ko u kamai du 95 Run.

Ka Myntdu deiwa rem ynne da neh ko da 10 Point iwa da pynhiar leh ya ka Net Run Rate yong ka hapoh i yong ka Nokrek Tigers iwa mut da yoh wa ar ki tangwa dang hakhmat ka Umiam kawa yoh 8 Point wei dang em sa kawi ka yalehke.

Ka Eagles da sdang ko deiwa bha hawa Bat deiwa yoh 47 tangwa u Aryan Bora hadien wa pynkut u ya ka kamai lang kiwa Bat nakhmat da pynhaap u sa 5 ngut yow yoh waroh 6/15 na ki 7.5 Over. Ini da man ko leh ka sien wa ar wa u Bora da yoh u 5 Wicket wei kattu waroh da yoh u 13 Wicket iwa boon dooh na kiwa kawang bol ha kani ka Tournament.

Da ye wow leh pyrchah da u Captain ka Eagles u Raj Biswa (33) wa u Wallam John L Kynshi (29). Da em leh kiwa yoh mynkna namo ki Extra kiwa da man 26 Run. Kiwi de kiwa yoh u pynhaap Wicket toh u Rohit Rai (2/17) wa u Riboklang Hynniewta (1/11).

Na kiwa kawang bol ka Umiam da lehbha u Lakhan Singh uwa da yoh 5/37 uwa da kawang 10 Over wei da yoh u leh yei naam Player-of-the-Match.

Na kiwa Bat ka Lions, u Junjun M Sangma da lehbha u deiwa yoh 26, katwa u Bora da pyrchang u wow pynjop deiwa syndong bha yei rukom Bat tangwa ym yoh lok u deiwa haap ma haap kiwa Bat heiwa oo da kamai u 13 Not Out hadien wa haap lut ha ka 27.4 Over. Kiwi de kiwa yoh Wicket ya ka Eagles toh u Aditya Singhania (2/14), Biswa (1/10) wa u Morningstar Khongwir (1/20).

Mynstep, ka Symper Panthers daw yachem ko waka Simsang Sharks kiwa waroh ar ym pu em u jop chisien leh.

Share this:
Previous

Da wai yaka Khnap Thang Mynsoo wa nyngkong ha ka Raij Raliang

Next

Pynbna u Nitin Gadkari ya 27 tylli ki sarok wa daw chna hapoh Arunachal Pradesh